Joh 12 | MCQ | STEP | Jesuho Pasova rehuna na'ia iropune kwino na'eme Petani roana. Ijaho Rasarasi ka'ene Jesura vejume kú'o 'urinajaho ijí hinuna.

John 12

Jesu Peteni Senisi 'Onahajina

(Matiu 26:6-13; Maka 14:3-9)

1 Jesuho Pasova rehuna na'ia iropune kwino na'eme Petani roana. Ijaho Rasarasi ka'ene Jesura vejume kú'o 'urinajaho ijí hinuna. 2 'Ejume pu Huni 'iruma i'í vejara. 'E'eme Mataho 'iruma 'e'eju'e Rasarasiho Hu hu'úmo 'aijua ka'ene 'iruma ihunijino asuma hijara. 3 Merira senisia ka'ene iha Natia huni ahija monia natohwi 'imejara kaivo niho'o mavarasa'ina 'omo apene usee Jesuni mumora 'ahi 'ona'i kaivo huni húmata sapasa kajino mumora 'ukunahana. 'Ejumakame senisia amua kajara sea vaja rarenana. 4 Huni tisaiporu pina Jutasi Isikariati ka'ene túna'i Hu nahamahunijara ijá 'iama 5 Rakijihuna'e senisia kajaho paapena va'e moni natohwa (K300) 'imene ea ka'ene uneunecha pa'ajihija'e ni'ajihe vajihunijaho avajo? 'iamana. 6 'Enakaivo hu ija'ina 'warama jihuni maijaho hu ea ka'ene uneunecha pa'ajihi vwihanie 'warahuna pana kaivo hu nesa rukina 'ee hu moni panika 'ajohe 'ee monia ka'ene ijí savujaho hu nesi 'ekuna. 7 'Ejume Jesu ijá 'wama Makama! Nara kwave ranamihuni jihuna'e Nuni haha amairiihe avanukúne. 8 Ea ka'ene uneunecha pa'ajija na'ia mapoka ja pu'úmo hijura kaivo Na na'ia mapoka pahihuna 'wamana.

Rasarasi 'Ana'irono Hemi Kosaravajina

9 Jesu ijí hinaji pu henareja Jua ea mapoka roara. Huhusu pana kaivo Rasarasi ka'ene kwavume Hura vejume 'urina kaji ka'i 'ahiume roara. 10 'Ejume ea ka'ene Jua puni pirisitia mama'inijipo ura Rasarasi 'u'o 'anae kwa'amarono 'wame amairiaravara. 11 Ijihuni maijaho hu 'urina kaji henareja Jua mapoka Jesu nimaa rojumakame ijihuna'e 'ana'i 'ahiara.

Niho'o Temaraji'i Jerusaremi Vaji Roe Arumajina

(Matiu 21:1-11; Maka 11:1-11; Ruku 19:28-40)

12 Ijihuni sú'u ea mapoka ka'ene ahaja ijume va'ajipo Jesura Jerusaremi rohunijaho hejara. 13 'Ejume pu ea mapoka haraja'a 'eke ninukujaha piuna'i vai'i ijá 'umeja

Hosana! Kinia ka'ene Natohwi jihuni iha 'ahi roujaho merajahu! 'umejara.
14 Jesu tonikia 'u'ua piuname ijihuni toi ajime hinana. Nitama Godoni irijaho ika'ina 'warame ijá 'iama

15 Saiani 'apahije ja pajuha kaivo Heha! Joni Kinia iviamai tonikia 'u'ua 'ahi asuma hine rou 'wamana.
16 Huni tisaiporu ikaho maraku'a pahejara kaivo Jesura kwamarena 'urina va'eme iji'a túna'i pu vwihajara. Ijí uneunecha ka'ene pura Hununa'i vejara 'ee Godi oni ira vaji marako Hua'e rone nahama 'waramajaho iji'a pu vwihajara. 17 'E'eme ea mapoka vea ka'ene Hura Rasarasi muna ari vaji na'eme 'umejume 'urijume ea mapoka kajipo kavara'omo ijí rone 'waravara. 18 Hu Huni aacha ike najahume hejajihuna ea mapoka va'e Hu piunavara. 19 'Enareja Parasiapo iji 'wamapene oji'i ijá 'wava Ijaho ja nikavo nú unenu'u pina areria pave'eju'e ea mapoka Huni túna'i va ranavara 'wavara.

Kurikia 'Ahopo Jesu Savajina

20 Kuriki ora ea 'aho'a ahaja ija kajino Godi ta'arohara. 21 'Enareja pu roe Piripuho Petasaita ora'omo Karari vaji pu aneja vene apoma ijá 'wava Nú ura Jesu ka'i 'ahúu 'wavara. 22 'Ejume Piripu roe Enituru 'waravume pu no'o va'e Jesuho 'waravara. 23 'Ejume Jesu eha vene pu ijá 'iama Emaa Puni Harihi jihuni pinana 'urihuni vea niroana. 24 Na nimaa nimai ja 'waravu. 'Witia 'ina mwe'i vaji pa'o'eje na'avajaho manavu kaivo mwe'i vaji 'onavajaho 'ina mapoka rehuna. 25 Ea irara huni hiiji oja ma'amajaho hu ranave pa'arehuna kaivo ea irara huni hia ka'ene mwe'i hinuji se'amajaho hu 'ajoha va'e majama hihuna. 26 Ea irara Nuni kaukara ve'amajaho maka'eje Na 'ararihi'amana. 'E'irakúne kwaa ka'ene Nara hi'ujino hu 'u'o hi'amana. Ea irara Nuni kaukara ve'amajaho Amora huni iha 'unama 'urihuna.

Jesura Kwahuniji Rona 'Waramajina

27 Iviamai Nuni oja tura'i 'ahiu. Na ichá 'wara'ejo? Amo vea iviamai roujaho ni'ajihe 'ajohia Na paare'uta kaivo ike vea ka'ene rou kehuni maijihuna'e Na routa. 28 Amo veje Oni iha huni pinana 'urinama. Ijihuna'e ira kahi akúpa 'ahi rena roa ijá 'wama Na Nuni iha huni pinana veju'e 'urinuna'omo Na kú'o veje 'urihuna 'wamana. 29 Ea mapoka ka'ene ijá namijajipo hejajaho akúpi 'onuja renana. 'Ejume ea 'ahopo 'wavajaho Godoni 'ona oji'ini Hu 'waramu 'wavara. 30 'Ejume Jesu eha vene ijá 'iama Ijí ira kajaho Nunijihuna'e pa'waramu kaivo jonijihuna'e 'waramana. 31 Iviamaakaho vea ka'ene mwe'a kehuni 'otua vehuni vei nirenu. Iviamai mwe'a kehuni natohwijaho pi'onahuna vei renu. 32 Vea ka'ene ea Na apenie ichutoi ahasirimi'avajino Na ea mapoka aherame Nuni rohuna 'iamana. 33 Hu ijí 'warama jihuni maijaho 'unama ka'ene Hura kwahuniji rona 'waramana. 34 'Ejume ea mapoka kajipo eha vene ijá 'wava Nú hejajaho Godoni ira ijá 'warumane Keriso majama hihuna 'úmana kaivo A ichá'ina 'warumo? Emaa Puni Hariha apena ichutoi ahasirihuna 'úmo? 'Ú ike Emaa Puni Harihijaho irane? 'wavara. 35 'Ejume Jesu pu ijá 'iama Hanaji'inijaho ja pu'úmo 'aha josu'a pahihuna. Iviamai hananukino 'urahe o'avara. 'E'irakúne nututijaho ja areri pana'irati'amana. Ijihuna'e ea irara nutuvi'ini 'urahonujaho hura 'unama ka'ene ichá vahunijaho puruva renu. 36 Hanaji'ina iki hinukúne nimaa ronareje ja Hanaji'ina kajihuni harihija reha. 'Ene Jesuho uneunechakija 'waramarena Hu va'e tanumana.

Emapo Panimai Rojajina

37 Hu niho'o aacha mapoka mapoka puni una'i najahana kaivo pu panimaa rojura. 38 Ijihuni maijaho poropeti Aisea nitama 'waramajara roe nimaa'e re'amarono ijá 'iama

Natohwe ea irahipo núra vu'a ka'ene 'waravajaho nimaa rojare? A ea irahija'e Natohwi jihuni harura najahane? 'iamana.
Noin 39 Pu niho'o panimaa rojajihuni maijaho Aisea kú'o ika'ina 'iama jihuna'e panimaa rojara.

40 Hu puni nia supamahana 'ee Hu puni oja vejume kisima'ura'e renana. Vejuro'i pu puni niiji kime 'ee puni ojijino vwihane nimaa roje Nara veje maranihuni jihuna'e avajuta 'iamana.
Noin 41 Aisea nitama ijí 'warama jihuni maijaho hu Huni pinanijaho nihena jihuna'e hu ijí rona 'waramana. 42 'Enakaivo ea mapoka ka'ene ea 'ajoha'ina mama'ina pu Hu nimaa rojara kaivo pu Parasi juhamareja pu panahama 'wavara. Pu panahama 'warava jihuni maijaho Sinakoku vaji roturihuni jihuna'e avajara. 43 Pu niho'o emaapo ta'arorahuniji oja vwihajujaho teamanamuna kaivo Godira pu ta'arora hunijaho pavwihajura.

Jesuni Irijara Eha Mihuna

44 'Ejume Jesu ajira ijá 'iama Ea irara Na nimaa roniujaho hu Nanaru pana kaivo Godi ka'ene Na ranamiume rouji 'u'o nimaa ronu. 45 Ea irara Na kimujaho hu Godi ka'ene Na ranamiume rouji kamu. 46 Na mwe'a kehuni hanaji'ina rena routa. 'Ena'omo ea irara Na nimaa ronujaho hu nutuvi'ina pahinuna. 47 Ea irara Nara 'waravujaho he'ika'i panimaa ro'amajaho Na iviamaa hu 'otua pavetihuna. Ijihuni maijaho Na mwe'akino 'otua ve'i rohuna pana kaivo mwe'ake ni'aja'i routa. 48 Ea irara Nara 'waravuji pata'arorihe 'ee Nuni Ira pahenihujaho ijara hu namahe 'otua vetihuna. Ike raka ka'ene Nara 'waravukipo vea túna'i 'otua vetihuna. 49 Na Nuni vwihaijaho ja pa'waravu kaivo Nara raka ka'ene 'waravukaho Amo ka'ene ranamiume Na roujara raka ka'ene 'wara'urono 'warimaji 'waravu. 50 Na niheju. Hura raka ka'ene 'waramajara veje majama hihuna. Nara raka ka'ene 'waravujaho Amora Na 'warima ja'ina'e 'waravu 'iamana.